my reflection

我唔係想寫膠文，但呢篇真係會有點膠。

每逢坐上單車，我就想叫港女收皮，因為佢地根本唔會明白男人的浪漫！（戴番個頭盔先，港女唔等於所有香港女性，而且都有女單車手的，不過唔會多）

港女真係一種矛盾嘅生物，甚至係違反邏輯、違反科學，不能理解！例如一邊話自己好肥，但一邊日日買零食，又唔做運動，又偏偏要每個月買一大堆減肥食品。食嘢會豐胸、瘦腰、收小腿？我不如去信符水治病。

港女非常怕悶，又冇乜耐性，但又真係冇乜運動係冇重複性架喎，所以佢地好多唔會做運動的。圍住運動場跑圈，悶；沿住海邊踩單車，悶；一班人追住個波跑來跑去，悶。有車唔搭走去行山，悶。

一年365日當中佢地肯去做幾日運動，就會覺得自己好sporty，所以希望另一半都係sporty。但真係有一個sporty嘅男人追佢地，係呀佢地會一齊做運動，不過係做一個鐘之後就去行街睇戲食飯唱K之嘛；或者行山行三十分鐘不到就要抖十分鐘，行到日落都行唔哂，行到人都癲！

再戴多頂頭盔先！好多男人其實都係咁，生活無無聊聊，放工只係去飲酒蒲吧或北上，攪到個個啤酒肚，老咗仲一大堆毛病；再戴多頂頭盔先！做人就係咁無無聊聊架啦，番工等收工，一出糧就向財團進貢，個個買I-Phone，如果Apple出智能屎坑，佢地都會仆到去買。

所以港女話港男乜乜物物、港男話港女乜乜物物，都係嘥氣（包括我呢篇文）！港男港女，本來就係臭味相投、天作之合。番大陸搵伴侶咪又係多餘，d女咪又係由同一個資本主義機器生產出嚟！

最後一個頭盔！其實我成日話港女乜乜物物，歸根究底，都只係我玩唔起資本主義嘅遊戲。佢地要日日有驚喜，我邊度有錢俾？所以我必然係悶人一個、亦必然係要踩單車行山跑步的。做運動可消耗多餘嘅精力，連小學雞都知道。

不過我有時都會心中怒吼：媽，為何結果不是我想的那樣？

祝大家母親節快樂！