青協進行咗一個19調查，訪問咗五百幾名30至64歲人士，當中逾八成半人認為年輕人被寵壞，但同時有六成人坦言唔明白年輕人．．．咁我可唔可以話大多數老嘢都係狗up怪？
佢地對年輕人有以下指控：33.5% 對年輕人持負面印象，認為我地冇目標、依賴、反叛；「守時、誠信、樂於助人、勤奮、公德心、禮貌、尊重別人、自強不息、責任感」呢ｄ方面評分都唔合格。唯一俾班老嘢讚嘅，就只有資訊科技運用能力、關心社會同「叻」（其實我唔知佢地講嘅「叻」係咩意思）。
其實既然咁多老嘢都唔明白年輕人，青協呢個調查就完全反映唔到年輕人嘅真象！不過我地又可以咁睇，即係話而家ｄ老嘢一方面唔明白、甚至唔肯去了解年輕人，但偏偏又要強加佢地嘅價值觀落我地身上，用佢地嗰一套嚟量度我地，所以年輕人永遠都係有錯！
我真係唔認為社會仲提倡緊「守時、誠信、樂於助人、勤奮、公德心、禮貌、尊重別人、自強不息、責任感」呢ｄ價值，包括班老嘢自己身上都冇啦！而家香港社會除咗講錢、就係錢同埋錢．．．呀，仲有氹年輕人買樓！你買唔起樓？就係冇上進心冇本事冇目標．．．（不過大部份年輕人都買唔起、所以大部份都欠缺人生目標）
至於資訊科技運用能力，我可唔可以話班老嘢點解連速成都學唔識、唔識上網、唔識用面書、唔識寫blog？時代唔同啦，呢ｄ係當今年輕人嘅「基本能力」，你地讚我地呢方面叻，我真係唔識笑！
至於反叛、激進，真係莫須有！年輕人對社會不公睇唔過眼，企出嚟反抗強權、或者想親手改造社會，咁就叫反叛？我都知你班老嘢係思想上嘅巨人，坐住個腦就能夠睇透世事、解決社會問題，但可惜仲係行動上嘅朱儒呢！
講番題目，年輕人被寵壞？我相信而家香港年輕人面對嘅困境，絕對唔會比上一、兩代容易，所以你班老嘢唔好再屈我地！而家得中五畢業想搵份工都難、讀大學／大專又欠債幾十萬、尋日有篇報導仲話七成年輕人五年內冇升過職、一直以來年輕人失業率又係最高、人工又最低。退一步講，如果香港年輕人咁都叫被寵壞、或者真係好廢，喂，我地都係你地班老嘢教出嚟架喎！
不過其實年輕人都有死罪架喇，鬼叫我地遲出世幾十年咩！不過最根本嘅問題係：鬼叫班老嘢當年唔用安全套！
