my reflection

較早前我寫過《邊個屈香港人仇富？！》，係因為我當時唔認同香港人有仇富心態，但而家嘅諗法改變咗！

其實任何公眾論述都係「自我實現預言」，即係本來個預言係不符事實，但如果我地當佢係真、仲因此改變自己嘅思想同行為，預言最後就會實現！香港人本來唔係仇富，但愈來愈多人講呢樣嘢，就愈來愈多人會反思香港貧富懸殊同財團所作所為，最終就會仇富！

香港政經命脈一直都係由大商家壟斷，特別係李＋Ｘ一家，衣食住行都要幫襯佢，本來冇咩人意識到呢個事實，但胡主席都要親自見佢一面後，真係醒哂！大家而家先醒覺原來李＋Ｘ係真正香港特首！

係lor，點解李＋Ｘ會有咁優厚嘅待遇呢？點解民主派冇得直接見胡主席？甚至連保皇黨都冇得見（不過可能見咗都唔公開）？香港人本來都係少少憎李＋Ｘ架喇，但而家就更加討厭佢！

再拉埋而家八十後年輕人嘅處境嚟講，原來七成年輕人最近五年冇得升職、甚至收入倒退！我地睇吓「富二代」出征大浪西灣、又睇吓領匯點樣逼走小商戶、再睇吓大家樂話最低工資會導致盈警、仲有「你要搭巴士呀，真陰公！」、法官姪女襲警案等等，呢ｄ好似九唔搭八嘅事件，原來都可以用仇富拉埋嚟講！

不嬲香港人仲要不嬲企喺有錢人嗰邊思考，你有錢係你嘅事。如果有錢佬唔係炒到ｄ樓天價咁高、又成日出嚟講東講西，香港人根本唔會仇富，只會一直發夢自己都可以一朝富貴！

而家香港人食都冇得食，後生仔睇唔到前景不特止，仲日日俾人鬧呢樣鬧嗰樣，真係唔仇富先奇！仇富又如何？唔通係我地嘅錯？

呢篇文可能寫得好混亂，將十九幾樣嘢撈埋嚟講、邏輯欠奉！但理性分析只會削弱民怨，即係削弱大眾嘅行動力、亦即係令社會運動更難成功！如果香港人想改變現狀，而家唔好再將逐個問題抽絲剝繭咁分析喇，我地諗ｄ簡單易明嘅口號仲好！

至少要點樣解決仇富？呢個問題係有錢人嘅責任，如果佢地仲係唔諗呢樣嘢，嚟緊元旦日，就唔只係拉吓鐵馬咁簡單架喇！